Euskal Diasporaren Nazioarteko Zentroa

Zerbitzu anitzetako egitura izateko pentsatuta dago gune hori; hor bertan izango lituzke Azkarateko Herriko Etxeak bere bulegoak. Iparraldeko gazteentzako egonaldiak koordinatzen dituen Uda Leku elkartekoak hartzeko gune izatea ere proposatu da.

Gazteluaren lehenengo solairua osorik zaharberrituko da, eta 8 Probintziak Elkarteak eta EuskoSarek eskainitako hainbat zerbitzu gauzatu ahal izango dira bertan. Era berean Euskal Argentina elkarteak genealogia bilaketa zentro bat antolatuko du, eta diasporako euskaldunek jasoko dituzte onurak batez ere. Multimedia baliabideak dituen gune bat izango du gainera genealogia ikerketa hori laguntzeko, munduko euskal komunitateetako informazio gaurkotura sartzeko aukera eskaintzeko, diasporako familiekin harremanetan jartzeko eta Azkarateko herritarrei zerbitzuak emateko.

EuskoSareri ere toki bat zuzenduko zaio, eta honek diasporarekin lotura duten proiektuei zentzua eman eta bideratu egingo ditu.

8 Probintziak elkarteak ideia horrekin lanean jarraituko du, beste ekimenen parean; hor dago adibidez munduan dagoen euskal emigrazioaren historiari eskainitako antzezlanaren proiektua –Biarritzeko Versant antzerki taldearekin lankidetzan-. Horrez gainera, planetan zehar sakabanatuta dauden euskaldunen bilaketan jarraituko du. Bestalde, egoitza hori erabiliko du hilabete bakoitzaren lehenengo igandean ematen den 8 Herrialdeak Zuzenean irratsaioaren (lau hizkuntzatan) emisiorako, eta tresna egokienez hornituko du.

Eraikinaren azken solairua, berrehun metro karratukoa, bere arbasoen lurra bisitatu nahi duten diasporako familiak hartzeko gune berezi izatera zuzenduko da; eta udalekuak egin nahi dituenarentzat ere zuzenduta egongo da, heziketa gaiak beti emigrazioaren gaiaren inguruan ibiliko direlarik.