Center for Basque Studieseko aholku-batzordeak bilera egin du

Martxoaren 2, 3 eta 4an Center for Basque Studieseko aholku-batzordea Renon izan zen. Egun horietan zehar hainbat ekimen egin zituzten. Esate baterako, ostiralean, hilak 3, Euskal Liburutegira egin zuten bisita. Bertan, Imanol Irizar liburuzainak liburutegiaren nondik norakoak azaldu zizkien: historia apur bat, liburutegiaren egoera eta etorkizuneko asmoei buruz aritu zen, besteak beste.

Bestalde, Center for Basque Studies osatzen duen taldeak zentroari buruzko aurkezpena egin zuen, beraien lanei buruz aritu ziren banan-banan. John Ascuaga’s Nugget kasinoan, berriz, koktela izan zuten ondoren.

Larunbatean egin zuen batzordeak bilera. Iluntzean berriz, Nugget kasinoan bertan afaria egin zuten Orozko jatetxean. Centerreko hainbat kide eta batzordekideek afaldu zuten. Ostean, txalaparta ikuskizuna, bai eta akordeoi eta gitarra emanaldia ere eskaini zitzaien bertaratutakoei, eta hauek kantu herrikoiak kantatu zituzten musikaren harira.

Azkenik, Gloria Totoricagüena Centerreko zuzendariak indioek ametsak harrapatzeko erabiltzen zuten objektu bat oparitu zion Tontxu Campos Aholkulariari ekitaldira joan zelako.